Во рамки на акцијата за одбележување на 17 октомври, меѓународниот ден за борба против сиромаштијата, вработените од Фондација „Фокус“, посетија неколку локални јавни институции и поделија индивидуални каси за донирање на нивните раководители и оние кои сакаа да дадат свој придонес во Фондот за поддршка.
На раководителките на АД Македонски пошти – Велес, Фондот за ПИО-Велес и на Локалната библиотека „Гоце Делчев„ лично им се заблагодаруваме за срдечниот прием и за несебичната поддршка на нашата акција.
Фондација „Фокус“ ќе продолжи со активностите и со посетата на институциите кои сакаат да се вклучат во оваа наша хумана мисија. Доколку сакате и Вам да Ви биде доделена индивидуална каса за донирање, можете да се јавите во Фондацијата - нашите волонтери ќе Ве посетат.
Фондацијата „Фокус“ во одбележување на меѓународниот ден за борба против сиромаштијата
Со акцијата за промовирање на Фондот за поддршка кој Фондацијата Фокус го воспостави минатата година, започна одбележувањето на 17-ти октомври, меѓународниот ден за борба против сиромаштијата.
Во соработка со „Алфа" маркети и фирмата Кенди ДООЕЛ од Скопје, беше организирана промоција на производите на оваа фирма со чиешто купување во Алфа маркетите низ градот, велешани директно донираат во Фондот наменет за дечињата од социјално немоќните семејства.
Поделени 30 комплета лектири од средства донирани од граѓаните
Фондацијата „Фокус“ подели 30 комплета лектири за трето, четврто и петто одделение, на децата кои се корисници на Фондот за поддршка. Средствата со кои беа набавени лектирите се собрани од граѓаните кои донираа во касите поставени во маркетите низ градот и х.Романтик, како и од индивидуалци кои своите донации ги уплатија на трансакциската сметка на Фондот во Комерцијална банка. На овој начин беа собрани 20.700,00 денари, од кои за лектирите се потрошени 18.216,00 ден.
Со овој настан симболично беше одбележан Светскиот ден на детето, како и крајот на учебната 2009/2010 година.
Тимот на Фондација „Фокус“ им се заблагодари на родителите за соработката, а на децата им посака пријатен летен распуст и успех во наредната година, со надеж дека ќе има можност и понатаму да ги поддржува, а на граѓаните да им овозможи да донираат кога и колку можат.