Во месец септември 2020 година започнаа едукативните работилници од проектот „Зелени детски градини“ со дечињата од клон „Ѕвончица“ во ОЈУДГ „Димче Мирчев“ во Велес.
Едукацијата се одржуваше според протоколите за заштита од ковид-19. Затоа едукативните работилници се одржуваа во дворот на градинката. По засадените мешункасти плодови во стаклени тегли и започнатиот процес на `ртење децата набљудуваа и се подготвуваа за засадување на билки во жардиниери.
На првата едукативна работилница,проектниот координатор Убавка Јаневска и асистентката Весна Кочова,интерактивно разговараа со малите градинари какви билки и зошто сакаат да ги засадат како и за придобивките од овие хербални растенија. Потоа ги нацртаа и од нив беше направена ликовна изложба. Сите цртежи беа убави и отценети со највисоки оценки, преку аплаузи.
А штом дечињата се определија за мајчина душичка, невен како и камилица и констатираа дека чајот кој ќе биде подготвен од нивните одгледани билки ќе го пијат затоа што научија како тој придонесува за здрав живот. Исто така, здрава храна одлучија да конзумираат откако ќе ги одгледаат леќата и пченицата што ќе се зачинат и со бербите на магдонос и нане. Секој плод што ќе го даде нивната мала зелена градина ќе биде предаден на чичко Борче, нивниот кувар, и употребен во кујната за подготовка на вкусен оброк.
Децата со градинарските алатки, купени од проектот исто како и жардиниерите ги наполнија со хумус за потоа откако на втората едукативна работилница за здрава храна го набљудуваа семето и се запознаваа со големината и формата, учествуваа и во засадувањето. Жардиниерите беа подготвени и внесени во занималните за да бидат што поблизу до нив и секојдневно да се набљудува растот на билките и мешункастите плодови.
Проектот „Зелени детски градини“ е финансиран од Министерството за животна средина и просторно планирање на Република Северна Македонија од програмата за поддршка на граѓански организации за 2020 година и финансиски поддржан од Општина Велес.