По неколкумесечната интензивна подготовка на Фондација Фокус во партнерство со Хаус оф хоуп - Ленче Здравкин и Асоцијацијата „Алзас –Македонија“ во партнерство со хуманитарната организација „Надеж на Ориентот“ од Лорен, Република Франција, во Велес на 11 април 2019 година пристигна хуманитарната помош наменета за јавните здравствени установи: Здравствен дом Велес, Болница за белодробни заболувања „Јасеново“ во општина Чашка и Клинички центар во Скопје.

Поконкретно донацијата, вредна 20 илјади евра, се состои во колички за лица со ограничена мобилност, помагала за движење, болничка опрема, масички, антидекубитни душеци како и компјутерска опрема што двете граѓански организации од Франција ја донираа во Здравствениот дом во Велес. 

Примопредавањето на донацијата на 12 април започна во Здравственот дом во Велес и продолжи во болницата во Јасеново, каде присуствуваше и Градоначалникот на Чашка Горан Стојановски.

На работните состаноци што донаторите ги имаа со директорите на Здрвствен дом - Велес, Никола Димовски и на Болница Јасеново, д-р Зоран Матев беше разговарано за продолжување на соработката преку покажан нов интерес и потреба од медицинска опрема и предмети што би придонеле за подигнување на квалитетот на здравствените услуги во двете јавни здравствени установи.

На примопредавањето на донацијата во Клинички центар во Скопје присуствуваше и Неговата Екселенција Амбасадорот на Франција во земјава Кристијан Тимоние коj меѓудругото ги поттикна граѓанските организации, партнери во реализацијата на хуманитарната помош, на уште поголема меѓусебна соработка.

Јавните здравствени институции во Велес, Чашка и Скопје се заблагодарија на донацијата и покажаа интерес за понатамошна соработка.

Фондација Фокус, ЗГ „Хаус оф хоуп - Ленче Здравкин“, Асоцијацијата „Алзас –Македонија“ и хуманитарната организација „Надеж на Ориентот“ од Лорен, Република Франција разговараа и за продолжување на соработката преку конкретни активности што можат да ги превземат годинава.